- Pange, lingua, gloriosi
- Córporis mystérium
- Sanguinísque pretiósi,
- Quem in mundi prétium
- Fructus ventris generósi
- Rex effúdit géntium.
- Nobis datus, nobis natus
- Ex intácta Vírgine,
- Et in mundo conversátus,
- Sparso verbi sémine,
- Sui moras incolátus
- Miro clausit órdine.
- In supremæ nocte coenæ
- Recumbens cum frátribus,
- Observata lege plene
- Cibis in legálibus,
- Cibum turbæ duodenæ
- Se dat súis mánibus.
- Verbum caro, panem verum
- Verbo carnem éfficit,
- Fitque Sanguis Christi merum,
- Et, si sensus déficit,
- Ad firmandum cor sincerum
- Sola fides súfficit.
- Tantum ergo Sacraméntum,
- Venerémur cérnui:
- Et antíquum documentum
- Novo cedat rítui;
- Præstet fides suppleméntum
- Sénsuum deféctui.
- Genitori Genitóque,
- Laus et iubilátio;
- Salus, honor, virtus quoque,
- Sit et benedíctio;
- Procedénti ab utróque
- Compar sit laudátio.
- Amen.
